मृत्यु ला झी दक्वसिया आज्जु
वैत तिफ्मयासें मगाः
अनं बिसिउँ वने फइ नं मखु
अय्नं थौंकन्हय् मृत्युया भाः,
दकलय् दंक कुहां वंगु दु
थुकिया भाः कुहां वनाः मू हे मदये धुंकल
ग्याःचिकु पिदनी
सुथय् दनाः बहनी लासाय्,
ग्वतुले माली मखु ला?
थौं मृत्युनापं गथे ज्यंकेगु
मतिइ लुइ
गनं काचाक्क मृत्युं थःत पाचिना हे बिउसां
मनूतय् हूलय् सुनां नं मखनीगु ला मखु ला
बजारय् वासःया हुलय् मृत्यु कानाच्वन
नसाः त्वँसाया भराय् दंगु विज्ञापनं
ल्वसुयाः वयाच्वंगु दु मृत्युं
तर प्वाः सुकूचिनाः
मृत्युं हाथ्या बियाच्वंगु दु उतिकं थन
मृत्यु जिगु नापसं
नापनापं जुयाच्वन
अय्नं जितः मृत्युया ग्याःचिकुं
हिस्यानाच्वन।