हलिमय् पलाः तये धुंकाः
- माधव मूल
'जि' या चाः तचाः
जुया वनां च्वन
छेँ दनाः हलिं न्यंक
घौपलख जक मखु
बरु, थन जि सदां न्ह्यानांतुं च्वना
जि थन वयागुया हुनि
थःत ब्वयेमाःगु दु
संसार त्याकेमाःगु दु
प्यखेरंया मिखातय्सं जितः स्वयाच्वन
आः जि दुनाच्वंगु न्ह्यपुया खिउँगालं
पिने मवसें मगात?
अथे हे मांया प्वाथय्या
ई लुमंसे वयाच्वन
अनं पिदनाः बँग्वाराया यात्राय्
जि नापं थनया लकस
जिगु लिउ लिउ न्ह्यानाच्वन
संसारया हिउपाःया झ्वलय्
जिं थःत ब्वाकाजुया
आः जिनापं जिगु देय् नं
लिउ लिउ वयाच्वन
जि नापं तुं
जिगु देय् नं चकंकेगु
ई वयाच्वंगु तायेकाः।
