मनूतय् शौख, इच्छा आकांक्षा धइगु नं अजूचायापु। सर्बियाया ओज्रेम धइगु गामय् आः नकतिनि अज्याःगु हे छगू अजूचायापुगु ज्याझ्वः जुल। व वास्तवय् छगू नसा नखः (फुड फेस्टिवल) खः। तर अन दयेका च्वंगु नसात्वँसा धाःसा फुक्क हे अण्डकोषयागु। विभिन्न जीवजन्तुया अण्डकोषपाखें दयेकातःगु विभिन्न डिशत अन ब्वयातःगु खः। अन द्वहं, भालु, उँट, अष्ट्रिच व थन तक कि कंगारुया अण्डकोश समेत दयेकातःगु खः।
अण्डकोषयागु जक नसा दयेकाः नकीगु थज्याःगु नसा नखः अन दँय्दसं हे जुइगु जुयाच्वन। अले दँय्दसं हे नसा नखतय् ब्वति काइपिं मनूत अप्वया नं च्वंगु दु। अन अण्डकोषया पिज्जा, अण्डकोषया हे शुप व मेमेगु खाना उपलब्ध दु। थज्याःगु नसा नापं मनूतय्सं अय्लाः व बियर नं गाक्क हे त्वनी।
अण्डकोषया नसाप्रेमितय् धापू कथं फुक्क जीवत मध्ये दकलय् साःगु अण्डकोष धइगु द्वहंयागु जुयाच्वन। द्वहंया अण्डकोष प्रति यक्वसिया आकर्षण दु।
उगु नसा नखःया अन्तिमय् अण्डकोषलिसे हे सम्बन्धित यानाः छम्ह मनूयात सिरपाः नं बी। थुगुसी उगु सिरपाः अमेरिकी राष्ट्रपति बाराक ओबामायात बीगु निर्णय जूगु दु। ओबामाया बारे उमिगु धापू दु ओबामां विश्वन्यंकं हे आर्थिक मन्दी जुयाच्वंगु इलय् अमेरिकाया शासन कःघाःगु खः। थुकिं पुष्टि जू वय्कः नं वास्तवय् धाथें हे ग्वः (अण्डकोष) दुम्ह मनू लानाच्वन।
