येँ(सन्ध्या टाइम्स)/अर्थ मन्त्री सुरेन्द्र पाण्डें नेपाल राष्ट्र बैंकया गभर्नर डा. युवराज खतिवडा, वरिष्ठ अर्थविद व वरिष्ठ सरकारी अधिकारीत लिसें सहलह यानादीगु दु।
एशियाली विकास बैंकं आः नकतिनि जक सार्वजनिक याःगु छगू प्रतिवेदनय् नेपाःया लिपांगु आर्थिक अवस्थायात कयाः न्ह्यथनातःगु खँय् सम्बन्धित सरकारी अधिकारी व सरोकारवालातसें चिउताः नं प्वंकूगु दु।
एशियाली विकास बैंकं सार्वजनिक याःगु सन् २०१०या एशिया प्यासिफिक प्रतिवेदनय् नेपालय् मध्यम वर्गीय परिवारया जनसंख्या अप्वया वनाच्वंगु  धासें उकिं देय्या अर्थतन्त्रय् लाक फुगु प्रभावया बारे अध्ययन यानाः तःगु खः।
उगु सहलहया झ्वलय् हे एडीबीया उगु प्रतिवेदन व नेपाःया अर्थतन्त्रया बारे प्रा. डा. गोविन्द नेपालं न्ह्यब्वःगु ज्यापतिइ मध्यम वर्गया जनसंख्या अप्वया वनाच्वंगु व उकिं अर्थतन्त्रय् लाके फुगु प्रभाव प्रति नीतिगत तहलय् गम्भिर जुइमाःगु खँ दुथ्याकातःगु दु।
अर्थ मन्त्रालयया सहसचिव महेन्द्र गुरुङ्गं एडीबीं सार्वजनिक याःगु उगु प्रतिवेदनय् दुथ्यानाच्वंगु नेपाःया अर्थतन्त्रया बारे याःगु लिपांगु अध्ययनया लिधंसा कयाः सरोकार पक्ष दथुइ विस्तृत रुपं सहलह जूगु जानकारी बियादीगु दु।
मध्यम वर्गय् अप्वया वनाच्वंगु पारिवारिक संख्यां नेपाःया अर्थतन्त्रय् लायेफुगु लिच्वःया बारे एडीबीं उगु प्रतिवेदन सार्वजनिक यायेवं अर्थमन्त्रीं सहलह ब्याकादीगु खः।